"LA PORTA DI SAMAIN" NON TEN TRUCO... NEN TRATO

Outro ano máis... De certo que teño a sensación de cambio estes días; a escuridade e o frío pasan a ser os protagonistas. A noite do 31 de outubro comeza o ano novo celta e a súa festa en honor dos defuntos, o Samaïn, marcando a transición ao inverno. Cando era pequena miraba para o campo que rodeaba a casa do meu tío Gilito (que non era millonario) e habían unhas cousas redondas que alumeaban na noite. Eran cabazas. Lembro que os cans ladraban e eu morría de medo, mais sempre volvía mirar para o campo, aínda que lle pedía á miña nai que me acompañase... Hai anos lembreime disto e creo que é impresionante que conservemos algo de tanta antigüidade. Non conservamos costumes que tiñan os nosos avós ou incluso os nosos pais e conservamos algo anterior ao Imperio Romano, de máis de tres mil anos antes de Cristo. É impresionante, mais temos que ter moi claro as súas orixes. Digo isto porque hai unha hora unha nena nas escaleiras da casa da miña moza díxome "Truco o trato". Non sei exactamente en que consiste iso, mais sóname de velo nas series norteamericanas e creo que lle dan caramelos ou cartos. O caso é que lle dixen a rapaza que non sabía o que me dicía e puxen cara de estrañada, que realmente é a que me quedou, pois non estou acostumada a estas cousas. Pasouvos a vós? Algunha nena ou neno chamou á vosa porta con esa frase? Creo que o "Halloween" se está asentando na nosa cultura co seu lado máis comercial e americano e perdendo o espírito que ten dende hai máis de seis mil anos. Ás veces dou en pensar que é unha sorte que na vida dos meus pais non entrara a televisión ata hai uns cerca de vinte anos. En fin, Feliz Ano Novo Celta a todos.